Մարդիկ, որոնք օգտագործում են էքսպոզիցիոն թերապիան՝ մեկ ֆոբիայի հաղթահարման համար, կարող են բացահայտել, որ ավելի քիչ են վախենում այլ բաներից, պարզել են գիտնականները նոր հետազոտության մեջ, որը հրապարակվել է Translational Psychiatry ամսագրում:
Հաճախ է պատահում, որ ֆոբիաների հակված մարդկանց մոտ մեկից ավելի ֆոբիաներ են զարգանում, - ասում է Ռուրի համալսարանի վարքագծային և կլինիկական նյարդաբանության ամբիոնի դոկտորանտ, առաջատար հետազոտող Իրիս Կոձագան։
«Տագնապն ինքնիրեն չի առաջանում: Մի վախով տառապող հիվանդների մոտ հաճախ առաջանում է մեկ այլ վախ»,- նշել է գիտնականը։
Հետազոտողների կարծիքով, պարզվել է, որ էքսպոզիցիոն թերապիան ամենաարդյունավետ բուժումն է ֆոբիաների համար: Թերապևտի հսկողության ներքո բախվելով վախ առաջացնող իրավիճակի՝ հիվանդները սովորում են հաղթահարել այն:
Սակայն երկար ժամանակ ենթադրվում էր, որ բազմաթիվ վախեր ունեցող մարդուն կպահանջի էքսպոզիցիոն թերապիայի բազմաթիվ փուլեր, որոնցից յուրաքանչյուրը ուղղված կլինի առանձին ֆոբիայի, նշել է Կոձագան:
Այս ենթադրությունը մերժելու համար հետազոտողները սարդերի նկատմամբ վախը բուժելու համար կիրառեցին էքսպոզիցիոն թերապիա 50 մարդկանց շրջանում, որոնք նաև բարձրության վախ ունեին։
Թերապիան սկսելուց առաջ մասնակիցները լրացրել են հարցաթերթիկները և կատարել առաջադրանքներ՝ իրենց ֆոբիաների քանակային գնահատականի համար: Օրինակ, հետազոտողները արձանագրել են, թե մասնակիցները որքան են համարձակվում մոտենալ սարդին և որքան բարձր կարող են ելնել եկեղեցու բարձր աշտարակը:
Արդյունքները ցույց են տվել, որ այն մարդկանց մոտ, որոնք անցել են սարդերի դեմ էքսպոզիցիոն թերապիա, բարձրության վախը նվազել է միջինը 15%-ով:
Ըստ Կոձագիի, դեռ պարզ չէ, թե ինչու է էքսպոզիցիոն թերապիայի արդյունավետությունը մի վախից մյուսին տեղափոխվում:
Հնարավոր է, որ դա կապված լինի նրա հետ, որ մարդիկ ավելի մեծ վստահություն են ձեռք բերում մեկ ուժեղ ֆոբիայի հաղթահարման արդյունքում, նշել է նա։
Հետևեք NEWS.am Medicine-ին Facebook-ում և Twitter-ում
ամիս
շաբաթ
օր